ياعراق
صار طبع الماي مايروي العطــــش.... ومالحه انهار الارض موجوعـــــه
لان ذن جرحين مودجله وفـــــــرات.... ومايهن دم الوطن ودموعــــــــــــه
والوطن ظل عل الوطن واكف حداد.... بناي مكسور ويلحن اللوعـــــــــــه
لان شاف امريكي مره ابرجله فــات.... اووصله من كاعه ابجعب مشلوعـه
ياعراق
جنت للعالم قبل قبه ومـــــــــــــــزار.... وتعتنيك ابشوك كلهه اطوفـــــــــــك
جنت سيف العرب شامخ لايلـــــــين.... ومن طحت هدت عليك اسيوفـــــــك
صدك حجاجك اخذ اسوء عقــــــاب.... وبعثرو جده وجديد احروفـــــــــــك
صرت مثل حسين في ارض الطفوف.... وماكو عباس اليهد لجروفــــــــــــك
وانته جم عباس صاير ياعــــــــراق.... وللعرب كلهه كطعت اجفوفـــــــــك
ياعراق
صدك ماظل بعد حر اليعتنيـــــــــك.... ولا برير وجون فزعولك ســــــــوه
اذن ايس موطني اشتنطر نهــــــــار.... والكسوف البيك مامنه ضــــــــــــوه
اذا شعبك قبل يزرعلك نخيـــــــــــل.... ويكطع التمرات ينطوك النــــــــــوه
واذا شعبك صار غابه من الذئــــاب.... الينجرح ويطيح يتأمــــــــــــــل دوه
ياعراق
اتريد من ثاني تطك بيك الــــــورود.... وانته بغدادك صفت جبد الحســــــن
وانته خيراتك سحل من الخيـــــــــام.... اكبال ابنائك يمظلوم انسبــــــــــــن
حته جاراتك بقت تنظر عــــــــــليك.... اووكفن اكبال السبايه وهلهلـــــــــن
واشترو دينك ابن دجله وفـــــــرات.... ابتسميه دولار وزعولك وثــــــــــن
ياعراق
تدري انته اشوكت ممكن تستــــريح.... ويمته صبحك يركد ايبطل سفــــــر
لمه ربك يأذن ايعود المسيـــــــــــح.... ويظهر الحجه الامام المنتظــــــــر
الأحد أكتوبر 19, 2008 3:21 pm
